Алматы полициясы электросамокат пайдаланушыларына маңызды ескерту жасады

Алматыда 2026 жылғы 29 маусым мен 1 шілде аралығында "Электросамокаттар және электрмопедтер" атты жедел-профилактикалық іс-шара (ЖПІШ) өткізіліп жатыр.

Қалалық полиция департаментінің түсіндіруінше, іс-шараның өткізілуіне электросамокаттарға қатысты жаңа ережелердің күшіне енуі себеп болған.

"Іс-шара 1 шілдеден бастап күшіне енетін заңнамадағы өзгерістер қарсаңында ұйымдастырылды. Аталған өзгерістерде электросамокат және электрмопед пайдаланушыларының құқықтары мен міндеттері, сондай-ақ кикшеринг қызметін көрсететін операторлардың жауапкершілігі айқындалған", – деп хабарлады Алматы қаласының тұрғындары мен қонақтарына полиция департаменті.

ЖПІШ-тің негізгі мақсаты – жол-көлік оқиғаларының алдын алу, жол қозғалысы ережелерінің бұзылуына жол бермеу және жеке мобильділік құралдарын пайдаланушылардың құқықтық мәдениетін арттыру.

Іс-шара аясында полиция қызметкерлері:

• жол қозғалысы ережелерінің сақталуына бақылауды күшейтті;
• профилактикалық рейдтер өткізіп, азаматтармен түсіндіру жұмыстарын жүргізіп жатыр.

Жолаушы тасымалдау, қауіпті маневр жасау, бағдаршамның тыйым салатын белгісіне өту, жолдың жүру бөлігін кесіп өту қағидаларын бұзу, сондай-ақ электросамокаттарды ретсіз жерге қалдыру сияқты өрескел заң бұзушылықтарды анықтауға ерекше назар аударылуда.

Алматы қаласы полиция департаменті Әкімшілік полиция басқармасының бастығы Абдинұр Тасыбаевтың айтуынша, тәртіп сақшыларының басты мақсаты – құқық бұзушылықтың алдын алу.

"Біз электросамокат пайдаланушылардың қауіпсіздік мәдениетін қалыптастырып, заңнаманың жаңа талаптарының сақталуын қамтамасыз етуге ұмтыламыз. Жол қозғалысының әрбір қатысушысы қауіпсіздікке ортақ жауапты екенін түсінуі керек", – деді ол.

Сондай-ақ Алматы қаласының полиция департаменті электросамокат және электрмопед пайдаланушыларын жол қозғалысы ережелерін сақтауға, өзге жол қозғалысына қатысушылардың құқықтарын құрметтеуге және заңнаманың жаңа талаптарын мүлтіксіз орындауға шақырды.