СҚО-да гаражда босанған әйел сәбиін қорапқа салып, сол араға тастап кеткен

Гаражда босанған Солтүстік Қазақстан облысының 25 жастағы тұрғыны шақалақты қорапқа салып, сол араға тастап кеткен, деп хабарлайды Zakon.kz.

Оқыс оқиға Ғабит Мүсірепов атындағы ауданда болған.

"Ғ. Мүсірепов атындағы аудандық орталық ауруханасына 25 жастағы жаңа босанған келіншек келіп түсті. Оның гаражда босанғаны анықталды. Тергеу амалдары қолға алынды. Істің барлық мән-жайы анықталуда", - деді СҚО полиция департаментінің баспасөз қызметі.

Құзырлы ведомство аталған фактіге сәйкес ҚР ҚК-нің 119-бабы, яғни қауіпті жағдайда қалдыру белгілері бойынша сотқа дейінгі тергеп-тексеру басталғанын атап өтті.

Жаңа туған шақалақ перинатальды орталыққа орналастырылды.

17 қыркүйекте СҚО-да анасы 11 жасар қызына пышақ жұмсап, ауыр жарақаттаған. Алдын ала болжам бойынша, әйел қызын үй тапсырмасын нашар орындағаны үшін жазалаған.