Астана аудандарының бірінің тұрғындары мүлік салығын төлемеу бойынша антирейтингте көш бастап тұр

Астана бойынша МКД жеке тұлғаларды әкімшілендіру және жалпыға бірдей декларациялау бөлімінің басшысы Ерасыл Бораш 2024 жылғы 20 қыркүйекте елорда тұрғындарының мүлік салығы бойынша қарыздары туралы статистиканы мәлімдеді, деп хабарлайды Zakon.kz.

Спикердің мәліметінше, бүгінгі таңда елорданың 15 579 тұрғынының жеке тұлғалардың мүлік салығы бойынша 206,4 млн теңге сомасында берешегі бар.

"Антирейтингті сомасы 88,4 млн теңгеден асатын Алматы ауданының тұрғындары бастап тұр. Айта кету керек, мүлік салығы есепті салық кезеңінен кейінгі жылдың 1 қазанына дейін мүліктің орналасқан жері бойынша төленуі керек. Яғни, 2023 жылғы салық 2024 жылғы 1 қазанға дейін төленуі тиіс, ал төлемді кешіктіргені үшін ҚР заңнамасына сәйкес өсімпұл есептеледі", — деп толықтырды Ерасыл Бораш.

Ол Салық кодексінің 528-бабына сәйкес ел аумағындағы жеке тұлғалардың мүлкіне салық салу объектісі ретінде келесілер ескерілетінін атап өтті.

• тұрғын үйлер, ғимараттар, саяжай құрылыстары, гараждар, тұрақ орындары және оларға меншік құқығымен тиесілі өзге де құрылыстар, үй-жайлар;
• Жеке тұлғаларға меншік құқығымен тиесілі жер учаскелері.

Сондай-ақ, спикер егер салық кезеңі ішінде салық салу объектісі меншік құқығында 12 айдан аз болса, онда мүлік салығы салық сомасын 12-ге бөлу және оның меншік құқығындағы нақты кезеңнің айларының санына көбейту арқылы есептелетінін еске салды.

Бұған дейін МКД атынан таратылып жатқан жалған хабарламалар жайлы ескерткен болатынбыз.