Бүгін Қазақстанның сегіз қаласында ауа сапасы нашарлайды

"Қазгидромет" РМК синоптиктері Қазақстан қалаларындағы ауа сапасына қатысты болжамын жариялады, деп хабарлайды Zakon.kz.

10 желтоқсанда Ақтөбеде, Павлодарда, Қарағандыда, Теміртауда, Өскеменде, Шымкентте, Алматыда және Астанада ауаның ластануының қолайсыз метеорологиялық жағдайлары күтіледі.

Қолайсыз метеорологиялық жағдай — атмосфералық ауаның беткі қабатында зиянды заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.

ҚМЖ жағдайында қала тұрғындарына мыналар ұсынылады:

• ашық ауада, әсіресе магистральдардың немесе тас жол бойында жүруден аулақ болу;
• балалар мен жүкті әйелдерге ұзақ серуендеуге кеңес берілмейді;
• өкпенің созылмалы аурулары, жүрек-қан тамырлары аурулары және аллергиялық аурулармен ауыратын адамдар көшеде жүргенде өздерімен бірге дәрі-дәрмектерді алып жүруі керек;
• ашық ауада физикалық белсенділікті шектеңіз;
• дене шынықтыру және спорттық іс-шаралар жабық спорт кешендерінде жүргізілуі керек.