Ақтауға жетекші мамандар бригадасымен санитариялық авиация борты жетті

Астанадан Ақтауға ұшақ апатынан зардап шеккендерге медициналық көмек көрсету үшін санитариялық авиация ұшағы қонды, деп хабарлайды Zakon.kz.

Бортта құрамында екі реаниматолог, 4 травматолог, нейрохирург және комбустиолог бар ҚР Денсаулық сақтау министрлігінің Ұлттық шұғыл медицинаны үйлестіру орталығының мобилдік бригадасы жетті.

Сурет: Денсаулық сақтау министрлігінің баспасөз қызметі

Ақтау әуежайы маңындағы жолаушылар ұшағы апатқа ұшыраған жерден облыстың медициналық мекемелеріне 29 зардап шегуші жеткізілді. Оның ішінде Маңғыстау облыстық ауруханасына 27 зардап шегуші жеткізілді.

Сурет: Денсаулық сақтау министрлігінің баспасөз қызметі

"Ауруханаға жеткізілген 27 ауыр пациенттің 11-і реанимацияға жатқызылды. Облыстық балалар ауруханасына 11 және 16 жастағы 2 бала келіп түсті, оларға операция жасау жоспарланып отыр", - деп хабарлады Денсаулық сақтау министрлігі.