Қазақстандықтар теміржол билетінің аздығына шағымдануда

Демалыс маусымы басталғалы алыс-жақын мекенге жол тартатындардың қарасы көбейді. Көбіне ұшақпен ұшу – қалтаға салмақ, көлікпен бару – машақат, ал үміт күткен теміржолда билет жоқ, деп хабарлайды Zakon.kz.

"Хабар" телеарнасының жазуынша, жазғы демалыста жолаушылар теміржол билетін таба алмай жүр. Жыл басынан бері елде 10 миллионға жуық теміржол билеті сатылды. Оның 2 миллионы – тек маусым айында өткен.

Ұлттық тасымалдаушы билет тапшылығы барын жоққа шығармайды. Дегенмен, мәселе күрделі емес дейді. Себебі кей бағыттарға қосымша пойыздар қосылған.

"Астана – Алматы, Астана – Шымкент, Астана – Ақтөбе бағыттарына қосымша пойыздар қосылды. Алакөлге сұраныс өте жоғары. Биыл бұл бағытта 13 маршрут жұмыс істеп тұр, оның төртеуі – тұрақты, тоғызы – маусымдық". Ерлан Жимайлов, "Жолаушылар тасымалы" АҚ сату департаментінің директоры:

Билет табылмаса, үміт –электронды кезекте.Мамандар жолаушыларға ресми сайт арқылы кезекке тұруды ұсынады. Биыл бұл жүйені 180 мыңнан астам адам пайдаланған. Алайда 40 пайызы ғана билеттерді сатып алған.

Компания өкілдерінің айтуынша, билет тапшылығын түбегейлі шешу мүмкін емес. Өйткені нақты қанша жолаушы жолға шығатынын алдын ала дөп басып болжау қиын. Барлық жоспар өткен жылдар көрсеткішіне сүйеніп жасалады. Сондықтан мамандар әр жолаушы ертерек қамданғаны дұрыс дейді.