Қар жауып, 3 градусқа дейін үсік жүреді: синоптиктер Қазақстанда күннің күрт суытатынын ескертті

"Қазгидромет" РМК синоптиктері 2026 жылғы 26–28 қыркүйекке арналған ел аумағындағы ауа райы болжамын жариялады, деп хабарлайды Zakon.kz.

Метеорологтардың мәліметінше, алдағы үш күнде ел аумағының басым бөлігіндегі ауа райын солтүстік-батыстан келетін антициклон айқындайды. Соның әсерінен көбіне жауын-шашынсыз ауа райы болып, ауа температурасы төмендейді.

"26–28 қыркүйекте елдің батысы мен солтүстік-батысында жауын-шашын күтілмейді. 27–28 қыркүйекте Қазақстанның солтүстігінде, шығысында және оңтүстік-батысында да жауын-шашынсыз ауа райы қалыптасады". "Қазгидромет" РМК баспасөз қызметі

Ал елдің шығысында, орталығында, оңтүстігі мен оңтүстік-шығысында атмосфералық фронттардың өтуіне байланысты найзағай ойнап, жаңбыр жауады. Алматы облысының таулы аудандарында түнде жаңбыр мен қар түрінде жауын-шашын түсуі мүмкін.

Сондай-ақ түнде және таңертең кей жерлерде тұман түседі. Облыстардың басым бөлігінде жел күшейіп, оңтүстікте шаңды дауыл соғуы мүмкін.

"Елдің солтүстігі мен шығысында түнде 1–3 градус үсік жүреді. 27–28 қыркүйекте солтүстік-батыс және орталық өңірлерде де осындай үсік күтіледі". "Қазгидромет" РМК баспасөз қызметі

Бұған дейін синоптиктер бүгін, 2026 жылғы 25 қыркүйекте, еліміздің 15 облысында дауылды ескерту жарияланғанын хабарлаған еді.