ІІМ LRT вагондары мен станцияларын тексерді

Қазақстан Республикасы Ішкі істер министрлігінің (ІІМ) қызметкерлері жеңіл рельсті көлік (LRT) вагондарын тексерді, деп хабарлайды Zakon.kz.

Ведомствоның 2026 жылғы 21 мамырдағы мәліметіне сәйкес, тексеріс барысында негізгі назар жолаушылардың қауіпсіздігін қамтамасыз ету және қоғамдық тәртіпті сақтау мәселелеріне аударылған.

"Құқық қорғау органдары қызметкерлері вагондарды, станцияларды және техникалық жүйелерді қарап шықты. Қауіпсіздік шаралары, сондай-ақ жолаушылардың қауіпсіз әрі жайлы тасымалдану жағдайлары зерделенді. ІІМ LRT нысандарында құқық тәртібі мен қауіпсіздікті қамтамасыз ету жұмыстары негізгі бағыттардың бірі болып қала беретінін атап өтті", – делінген ведомство хабарламасында.

Еске салайық, Астанада LRT қозғалысын 2026 жылғы 16 мамырда Президент Қасым-Жомарт Тоқаев іске қосты. Келесі күні жолаушылар саны күрт артып, үлкен қарбалас байқалды, сондай-ақ кейбір штаттан тыс жағдайлар тіркелді. CTS компаниясы мұны жолаушылардың қауіпсіздік ережелерін сақтамауымен түсіндірді. Кейін белгілі болғандай, тек 17 мамырдың өзінде LRT қызметін шамамен 100 мың адам пайдаланған.