Алматыда заңсыз тұрғын үй кешендерін жарнамалаған жылжымайтын мүлік сайттарына айыппұл салынды

Алматы қаласында танымал жылжымайтын мүлік платформалары – Krisha.kz және Korter.kz заң талаптарын бұза отырып жарнама орналастырғаны үшін әкімшілік жауапкершілікке тартылды. Бұл туралы Алматы қаласының Қала құрылысын бақылау басқармасы мәлімдеді.

Ведомствоның хабарлауынша, аталған интернет-алаңдар үлескерлердің қаражатын тартуға рұқсаты жоқ тұрғын үй құрылысы нысандарын жарнамалаған.

2026 жылғы 17 маусымда жарияланған ақпаратқа сәйкес, жүргізілген тексеру жұмыстарының нәтижесінде Krisha.kz және Korter.kz интернет-платформаларының операторларына қатысты әкімшілік құқық бұзушылық туралы хаттамалар толтырылды.

Оларға "Тұрғын үй құрылысына үлестік қатысу туралы" заң талаптарын бұза отырып, құрылыс нысандарының жарнамасын орналастырды деген айып тағылып отыр.

Аталған интернет-алаңдарда жарнамаланған нысандарда мұндай рұқсат құжаттары болмаған.

Нәтижесінде екі компанияға да әкімшілік айыппұл салынды: "Колеса" АҚ-на (Krisha.kz) – 1000 АЕК, ал "Флетфай-Қазақстан" филиалына (Korter.kz) – 500 АЕК көлемінде айыппұл тағайындалды.

Еске сала кетейік, бастапқы тұрғын үй нарығынан баспана сатып алмас бұрын азаматтарға құрылыс салушыда үлескерлердің қаражатын тартуға берілген рұқсаттың және басқа да рұқсат құжаттарының бар-жоғын тексеру ұсынылады.

Салынып жатқан нысандарға қатысты рұқсат құжаттары туралы ақпарат алу үшін тұрғындар Қала құрылысын бақылау басқармасының +7 (705) 89 66 000 нөмірі бойынша анықтамалық WhatsApp-арнасына жүгіне алады. Айта кету керек, арна іске қосылғаннан бері азаматтардан түскен 10 мыңнан астам өтініш қаралған.