Жалған хабарландырулар: туристер арасында танымал Booking.com платформасы тексеріліп жатыр

Еуропалық комиссия Booking.com платформасына қатысты алаяқтық пен фишингке байланысты ресми тексеру бастады, деп хабарлайды Zakon.kz.

Еуропалық комиссияның пікірінше, Booking.com платформасы Цифрлық қызметтер туралы заң талаптарын бұзуы мүмкін. Осыған байланысты 2026 жылғы 21 қазанда ресми тексеру басталды. Бұл туралы ведомствоның ресми сайтында хабарланды.

Booking.com – 1996 жылы Нидерландтың Амстердам қаласында құрылған қонақүйлерді онлайн брондау жүйесі. Платформа әлемнің түкпір-түкпіріндегі қонақүйлердің, пәтерлердің, қонақ үйлердің, виллалардың және басқа да орналастыру орындарының ұсыныстарын біріктіреді.

Тексеру үш негізгі бағыт бойынша жүргізіледі:

• алаяқтық сипаттағы және талаптарға сәйкес келмейтін хабарландырулар;
• брондау деректері мен қонақтардың жеке мәліметтерін пайдаланып жасалатын фишинг;
• жарнамалық хабарландырулардың ашықтығы.

Комиссия Booking.com компаниясының заңсыз контенттің таралуына байланысты жүйелік тәуекелдерді дұрыс анықтап, бағалағанын тексереді.

Мұндай контентке жалған хабарландырулар, мысалы, шын мәнінде жоқ орналастыру орындары туралы ұсыныстар, басқа тұлғаның атын жамылып жасалатын алаяқтық және тұтынушылардың құқықтарын қорғауға кері әсер етуі мүмкін талаптарға сай емес хабарландырулар жатады.

Тексеру барысында платформа осы тәуекелдерді азайту үшін тиімді шаралар қабылдаған-қабылдамағаны да анықталады. Атап айтқанда, алаяқтық сипаттағы және талаптарға сәйкес келмейтін хабарландыруларды жою жұмысы қаралады.

Бұған дейін туризм саласының сарапшысы визалық және көлік қатынасына байланысты қиындықтарды, сондай-ақ қылмыс деңгейін ескере отырып, жалғыз саяхаттайтын әйелдерге қолайлы төрт елдің тізімін ұсынған болатын.