Павлодарда көпқабатты тұрғын үйден шыққан өрт алты пәтерді шарпыды

9 шілдеде сағат 18:28-де Павлодар қаласында Естай көшесіндегі орналасқан 10 қабатты көппәтерлі тұрғын үйде өрт шықты, деп хабарлайды Zakon.kz.

Павлодар облысы ТЖД баспасөз қызметінің хабарлауынша, өрт 7-қабаттан 10-қабатқа дейінгі балкондарды шарпыды. Өрт үш адамға тиесілі алты пәтерге тарады. Өрттің жалпы ауданы 60 шаршы метрді құрады.

"Өрт сөндірушілер келгенге дейін тұрғындар өз бетінше оқиға орнын тастап, сыртқа шыққан. ТЖД бөлімшелерінің жедел іс-қимылдарының арқасында өрт 19:14-те оқшауланып, толығымен жойылды. Өрттің көрші пәтерлерге таралуына жол берілмеді", делінген хабарламада.

Оқиға орнында 31 адамнан тұратын ТЖД күштері мен құралдары және 13 бірлік техника, сондай-ақ Апаттар медицинасы орталығы жұмыс істеді.

Зардап шеккендер жоқ.

Өрт сөндірушілер өрт қауіпсіздігі ережелерін сақтау қажеттігін еске салады.

Бұған дейін Балқаш көлінде үрлемелі шеңбердегі сегіз жасар баланы қатты жел ұшырып әкеткенін жазғанбыз.