Қостанай облысында 100-ге жуық адам қар құрсауында қалып кеткен

23 ақпанда түнде Амангелді ауданында Амантоғай ауылынан 22 шақырым жерде "Әулиекөл-Жалдама" тас жолының жабық учаскесінде ТЖМ күштерімен 98 адам, оның ішінде 18 бала құтқарылды, деп хабарлайды Zakon.kz.

ҚР ТЖМ баспасөз қызметінің хабарлауынша, құтқарылған 7 адам, оның ішінде 6 бала Амантоғай ауылының жылыту пунктіне жеткізілді. Сондай-ақ қар құрсауынан сегіз жеңіл көлік жолдың тазартылған учаскесіне сүйреп шығарылды.

"Сарыкөл ауданында Соналы ауылынан 5 шақырым жерде "Сарыкөл-Комсомольское" тас жолында ТЖМ күштері қар құрсауынан автожолдың тазартылған учаскесіне екі жеңіл автокөлікті сүйреп шығарды. Медициналық көмекке ешкім де мұқтаж болған жоқ", делінген төтеншеліктер хабарламасында.

Бұған дейін еліміздің алты өңірінде кейбір жол учаскелері ішінара жабылғаны хабарланған.