ІІМ шетелде тұратын қазақстандықтар үшін жағымды жаңалықпен бөлісті

ҚР ІІМ ресми өкілі Шыңғыс Әлекешев шетелде жүрген ел азаматтары үшін мемлекеттік қызметтер әлдеқайда қолжетімді бола түсетінін айтты, деп хабарлайды Zakon.kz.

Шыңғыс Әлекешев ел ішінде ғана емес, сондай-ақ тыс жерлерде де азаматтарымыз үшін мемлекеттік қызметтерді оңтайландыру бойынша шаралар қабылданып жатқанын атап өтті.

"Қазақстанның 15 елде орналасқан 32 шетелдік мекемесі бар: АҚШ, Германия, Жапония, Оңтүстік Корея, Ресей, Өзбекстан, Түркия, Біріккен Араб Әмірліктері, Бельгия, Қытай, Ұлыбритания, Испания, Италия, Беларусь, Қырғызстан. Міне осы елдердегі азаматтарымызға арналған электрондық құжаттандыру қызметі іске қосылды", – деді ол.

Енді, оның айтуынша, шетелде тұратын қазақстандықтар құжаттарды үш-алты айлап күтпейді, барлығы 30 күн ішінде бітіп кетеді.

"Ағымдағы жылы ІІМ СІМ-мен бірлесіп отандастарымыз ең көп тұратын әлемнің 10 қаласында осы сервисті консулдық қызметтерге үйлестіре кеңейтуге бастамашылық жасайды. Атап айтқанда, Оттава, Торонто, Вена, Афина, Варшава, Киев, Париж, Прага, Баку, Ұлан-Баторда", - деп атап өтті Шыңғыс Әлекешев.