Әйелге балағат сөз айтқан павлодарлыққа 60 мың теңге айыппұл салынды

Павлодар тұрғыны мас күйінде әйелге балағат сөз айтып, агрессия танытқаны үшін сотқа тартылды, деп хабарлайды Zakon.kz.

Irbistv.kz мәліметінше, 55 жастағы ер адам Көлбұлақ ауылындағы Маралды көлінің демалыс аймағында әйелмен жанжалдасқан. Ол мас күйінде қызметтік бөлмеде әйелге былапыт сөздер айтқан.

Сотта ер адам кінәсін мойындап, істеген ісіне өкінетінін білдірді.

"Істі қарау нәтижесінде сот оны Әкімшілік құқық бұзушылық туралы кодекстің 434-бабының 1-бөлігінде көзделген әкімшілік құқық бұзушылықты жасағаны үшін кінәлі деп таныды", – деп хабарлады Шарбақты аудандық соты.

Алайда сот жеңілдететін мән-жайларды ескеріп, әкімшілік айыппұл мөлшерін 30%-ға азайтты. Нәтижесінде ер адамға 60 550 теңге айыппұл салынды. Сот қаулысы заңды күшіне енді.

Ал Қостанай облысында ұлы қалалық мәдениет және демалыс саябағында былапыт сөздері бар әндерді орындағаны үшін әйелге айыппұл салынды.