Алматыда мас шетелдік полициядан қашпақ болды – оқиға видеоға түсіп қалған

Алматыда патрульдік полиция мас жүргізуші басқарған көлікті қуып жетіп, жолын бөгеді. Райымбек даңғылы бойымен тәртіп сақшыларынан қашуға тырысқан жүргізуші Қытай азаматы болып шықты, деп хабарлайды Zakon.kz.

Бұл туралы 2026 жылғы 15 қазанда қалалық Полиция департаментінің баспасөз қызметі хабарлады. Ведомствоның мәліметінше, оқиға Алмалы ауданын патрульдеу кезінде болған.

"Боран-230" экипажы батыс бағытқа қарай жоғары жылдамдықпен келе жатқан, Қытайдың мемлекеттік нөмірі тағылған күдікті көлікке назар аударған.

"Жүргізуші көлікті тоқтату туралы заңды талапқа бағынбады. Полицейлер оны қуа жөнелді. Нәтижесінде көліктің жолын бөгеп, тоқтату мүмкін болды", – делінген Полиция департаментінің хабарламасында.

Көлікті Қытай азаматы басқарған. Оның мінез-құлқына қарап, полицейлер мас болуы мүмкін деп күдіктеніп, дереу медициналық куәландыруға жіберген.

Посмотреть эту публикацию в Instagram

Публикация от Алматы қаласының ПД | ДП г.Алматы (@almaty.police)

Тексеру нәтижесінде жүргізушінің орта дәрежеде мас болғаны анықталды. Ер адам бірден көлік басқарудан шеттетілді. Жиналған әкімшілік материалдар шешім қабылдау үшін сотқа жолданды.

2026 жылғы 23 маусымда Алматы полициясы ұрланған көлікпен жүргізуші куәлігінсіз қалада жүрген мас ер адамның ұсталғанын хабарлаған еді.