Балалар омбудсмені Шымкент балабақшасындағы көрсетілген қатыгездікке пікір білдірді

Желіде жеке балабақшадағы тәрбиешінің балаға көрсеткен қатыгездігі бейнеленген кадрлар тарап кетті, деп хабарлайды Zakon.kz.

Видеода әйелдің ұйықтап жатқан қыздың шашынан ұстап, оны еденге лақтырып жібергенін көруге болады.

Аталмыш жайтқа Қазақстанның Бала құқықтары жөніндегі уәкілі Динара Закиева Facebook парақшасында пікір білдірді.

"5 қыркүйекте зардап шеккен баланың әкесі "111" нөміріне жүгінді. Осы факті бойынша қаланың білім басқармасымен және полиция департаментімен жұмыс істедік. Іс басталды, қазіргі уақытта СМЭ нәтижелері күтілуде. "111" баланың әкесімен байланыста, іс өңірлік уәкілдің бақылауында", — деп жазды ол.

Бұған дейін Атырауда жеке балабақшалардың бөтен балалар үшін миллиондаған сомаға мемлекеттік тапсырыс алып келгені белгілі болды.