Атырау облысында қорғаныс бөгеті қалпына келтіріліп, тұрғындар эвакуацияланды

23 мамырға қараған түні Махамбет ауданы Жалғансай ауылында қорғаныс бөгетін қалпына келтіру жұмыстары қарқынды жүргізілді, деп хабарлайды Zakon.kz.

Атырау облысының Төтенше жағдайлар жөніндегі жедел штабының мәліметінше, қорғаныс бөгетін қалпына келтіру жұмыстарына ТЖД құтқарушылары, жергілікті тұрғындар, еріктілер, әскери қызметкерлер және 35 техника жұмылдырылған.

Оқиға орнында Атырау облысының әкімі Серік Шапкенов те төбе көрсетті .

Жалғансай ауылының тұрғындарын эвакуациялау қарқынды жүріп жатыр. Шұғыл түрде Д. Төленова орта мектебінің эвакопунктінде 02:30 жағдай бойынша 99 адам, оның ішінде 63 бала орналасты. Сағат 04:00-дегі жағдай бойынша алдын ала эвакуацияланғандардың саны айтарлықтай өсті. Осы сағатта барлығы 154 адам орналастырылды, оның 96-сы балалар.

Бұл мектептен басқа эвакуация орындары да анықталған:

• Е. Ағелеуова атындағы орта мектеп. ;
• "Нұршуақ" балабақшасы;
• "Алтынай" балабақшасы.

Жергілікті тұрғындар мен мамандардың бірлігі, сондай-ақ олардың үйлесімді іс-қимылдары нәтижесінде Жалғансай ауылындағы бүлінген бөгет сағат 03:00-де қалпына келтірілді.