Алматыдағы тұрғын үй кешенінің бірінде есірткі сатушылары ұсталды

Алматыдағы тұрғын үй кешендерінің бірінде "Дәрмек" жергілікті іс-шарасы кезінде Прокуратураның үйлестіруімен есірткі қылмысына қарсы күрес бөлімі мен Бостандық аудандық полиция Басқармасының қызметкерлері екі ер адамды ұстады, деп хабарлайды Zakon.kz.

Ведомство ақпаратына сүйенсек, күдіктілердің бірінің үйін тінту барысында ақ ұнтақ заты бар 156 байлам, есірткі сататын сайтқа арналған QR коды бар 5 мың жарнамалық жапсырма, электронды таразы және қаскөйлер есірткіні бөлшек саудада сату үшін пайдаланған басқа да құрал-жабдықтар анықталды және тәркіленді.

"Сот-химиялық сараптамасының қорытындысына сәйкес, тәркіленген ақ түсті ұнтақ заттар "мефедрон" психотроптық заты болып табылады. Бостандық аудандық полиция Басқармасы есірткі заттарын сату дерегіне қатысты қылмыстық іс қозғады. Екі күдікті де уақытша ұстау изоляторына қамалды", — деді, Алматы қалалық полиция Департаменті бастығының бірінші орынбасары, полиция полковнигі Қуатбек Науатов.

ҚР ҚК-нің 201 бабына сәйкес өзге ақпарат тергеу мүддесіне орай жария етілмейді.

"ҚР Конституциясының 77 бабы 3-бөлімі, 1-тармағы, ҚР ҚК-нің 19-бабы 1-тармағына сай кез келген азамат сот шешімі заңды күшіне енгенге дейін кінәсіз деп саналады".Алматы ПД баспасөз қызметі

Бұған дейін Жамбыл облысында екі есірткі тобының құрықталғаны хабарланған болатын.