200 мың еуроны Қазақстаннан заңсыз әкетуге әрекеттенген

Астана әуежайында ірі көлемдегі ақшамен валюталық бақылауды бұзушы ұсталды, деп хабарлайды Zakon.kz.

Астана қаласы бойынша Мемлекеттік кірістер департаменті "Әуежай-Астана" кеден бекетінің басшысы Абылай Молдабеков қолма-қол ақшаны декларацияламау фактісінің анықталғаны туралы айтты.

"2025 жылғы 26 маусымда Астана қаласындағы "Нұрсұлтан Назарбаев" халықаралық әуежайында Астана-Стамбул бағыты бойынша шығатын халықаралық рейсте кедендік бақылауды жүргізу кезінде Қазақстан Республикасынан ақша қаражатын заңсыз әкету әрекетінің жолын кесті. Азамат кедендік бақылаудан өткен кезде қолда бар қаражатын декларацияда көрсетпеген, сол арқылы белгіленген міндеттемелерді орындамаған. Абылай Молдабеков

Рентген-телевизиялық қондырғының көмегімен багажды тексеру кезінде 200 мың еуро (120 миллион теңге) валюталық ақша табылды. Астана қаласы бойынша Мемлекеттік кірістер департаменті мен әуежайдың Авиациялық қауіпсіздік қызметінің қызметкерлері сома міндетті декларациялауға жататын шекті мәннен асып кеткенін тіркеді.

"Осы факті бойынша материалдар ҚР қолданыстағы заңнамасына сәйкес қарау үшін Астана қаласы бойынша Экономикалық тергеу департаментіне жолданды", – деді кеден бекетінің басшысы.

Сонымен қатар, жыл басынан бері 280 миллион теңгені құрайтын қолма-қол ақшаны заңсыз әкету бойынша 29 факті анықталды. Сот 78 миллион теңгені тәркілеп, 19 миллион теңге айыппұл салды.

Астана қаласы бойынша Мемлекеттік кірістер департаменті Қазақстан Республикасы Президентінің жарлығына сәйкес 10 000 АҚШ доллары баламасынан асатын шетел валютасы мен ақша құралдарын, сондай-ақ алтын құймаларын әкетуге тыйым салынғанын еске салды.

Бұған дейін квазимемлекеттік сектордың шенеуніктері мен қызметкерлері 1,6 миллиард теңгені жымқырғаны үшін сотталғаны белгілі болған.