Ресейде Инновациялық технологиялар саябағының өкілдігі ашылды

Қазақстандық «Инновациялық технологиялар саябағының» өкілдігі ресейлік «Сколково» технопаркінде жұмыс істейтін болды.

Бұл – Еуразиялық экономикалық одаққа мүше елдер басшыларының Сочи қаласында өткен Жоғары Еуразиялық экономикалық кеңесте жеткен келісімдердің нақты бір нәтижесі. Филиалды ашу рәсіміне Қазақстан Республикасы Премьер-министрінің орынбасары Асқар Жұмағалиев қатысты. Бұл шара «Ашық инновациялар-2017» VI Мәскеу халықаралық форумының аясында өткен. Биылғы форумның басты тақырыбы – цифрлық экономика. Әлемнің 90 елінен жиналған 18 мыңнан астам қатысушы цифрлық экономика мен әлемдік ақпараттандыруға қатысты ғаламдық үрдістердің трансформациялануын талқылауда.

Асқар Жұмағалиев, ҚР Премьер-министрінің орынбасары:

– Қазіргі таңда Президент тапсырмасымен сәйкес «Цифрлық Қазақстан» бағдарлама жобасы бойынша жұмыс істеп жатырмыз, осы бағдарлама ішінде біз ең маңызды элементтерді анықтайтын боламыз. Біріншіден, ол – адами капиталды дамыту. Сочиде Президент берген тапсырмаға сәйкес «Сколково» базасында Инновациялық технологиялар паркінің өкілдігін аштық.

Источник: khabar.kz