Ұлытау облысында өрт қаупіне байланысты орманға баруға шектеу қойылады

"Ұлытау облысының мемлекеттік орман қорының аумағында өрт қаупі күшейген кезеңдегі шектеу туралы" әкімдіктің қаулысы дайындалды, деп хабарлайды Zakon.kz.

"Жеке тұлғалардың орманға баруына және оған көлік құралдарының кіруіне, Ұлытау өңірінің мемлекеттік орман қоры аумағында жекелеген жұмыс түрлерін жүргізуіне жоғары өрт қауіпті кезеңге шектеулер енгізу", - делінген құжатта.

Осыған байланысты «Ұлытау облысының табиғи ресурстар және табиғатты пайдалануды реттеу басқармасы» мемлекеттік мекемесіне:

• орман аймағында жоғары өрт қаупі туралы уақытылы хабарлауға;
• мемлекеттік орман қоры аумағына кіре берістегі негізгі жолдарда күзет бекеттерін орнату бойынша қажет шараларды қабылдасын.

Қаулының орындалуын бақылау Ұлытау облысы әкімінің жетекшілік ететін орынбасарына жүктелсін.

Құжат Ашық НҚА веб-сайтына 11 шілдеге дейін жарияланған.

«Қазгидромет» РМК мәліметі бойынша, Қазақстанның бірқатар облыстарында, соның ішінде Ұлытау облысында жоғары өрт қаупі бар.

Бұған дейін Абай облысында қатты өрт тұтанып, оның барысында 60 мың гектар орман жанып кеткені хабарланған еді. 14 адам қайтыс болды. 

Астана маңында бірнеше күн бойы қураған ағаштар өртеніп, өрт сөндірушілер жалынды сөндірді.

Бір күн бұрын Іле-Балқаш қорығы аумағында 150 гектар қамыс өртенді. Өрттің жалпы ауданы шамамен 6200 гектар болды.