Түркия мен Сириядағы жер сілкінісінен 500-ден астам адам қаза тапты

6 ақпан күні таңертең Түркия мен Сирияда күшті жер сілкінісі болды. Салдарынан қаза тапқандар саны 500 адамнан асты: оның ішінде 230-дан астам сириялық және кем дегенде 280 түрік азаматы бар, деп хабарлайды Zakon.kz.

Сирия денсаулық сақтау министрлігінің мәліметінше, Алеппо, Латакия, Хама және Тартус провинцияларында 237 адам қаза тауып, 639-ы жараланды, деп жазды РИА Новости басылымы.

Түркия вице-президенті Фуат Октай 284 адам қаза тауып, тағы 2383 адам жарақат алғанын айтты.

Оның айтуынша, қаза тапқандардың көбі Кахраманмараш тұрғындары – 70 адам, онда 300-ге жуық ғимарат қираған. Жараланғандардың көбі Шанлыурфа провинциясында – 600-ге жуық адам.

6 ақпан күні таңертең Кахраманмараш провинциясында магнитудасы 7,4 болатын жер сілкінісі болды. Түрлі қалада жүздеген ғимарат қирап, Хатай провинциясында газ құбыры жарылды. Елде дабылдың ең жоғары деңгейі жарияланды.

6 ақпан күні Қасым-Жомарт Тоқаев Түркия президенті Режеп Тайып Ердоғанға көңіл айту жеделхатын жолдады.