Тоқаев су тасқыны туралы: оң өзгерістер анық байқалады

16 сәуірде Президент Қасым-Жомарт Тоқаев СҚО-дағы су басқан аумақты тікұшақпен аралап көргеннен кейін қарғын су салдарынан эвакуацияланған аудандардың халқымен кездесті,- деп хабарлайды Zakon.kz.

Тұрғындармен әңгімелесу барысында Қасым-Жомарт Тоқаев шығындарды өтеу үшін мемлекет барлық тиісті шараны қабылдайтынын айтты. Мәселен:

• су тасқынынан зардап шеккен барлық тұрғынға бірреттік көмек берілетінін;
• комиссия мүлік шығындарын есептегеннен кейін өтемақы төленетінін;
• тұрғын үйі жарамсыз азаматтарға жаңа баспана салынатынын;
• зардап шеккендер барлық қажетті инфрақұрылыммен қамтамасыз етілетінін;
• тұрғындардың несиелері мен займдарын төлеу мерзімі шегерілетінін.

Сурет: akorda.kz

Мемлекет басшысы ешбір азамат назардан тыс қалмайтынын атап өтті.

"Қазір бәріміз өте күрделі кезеңді бастан кешіп жатырмыз. Бұл – жалпыұлттық апат. Дегенмен, бір жағынан алып қарасақ, оң өзгерістер де анық байқалады. Судың беті қайтып келеді. Жақын арадағы 10 күнде өте қауіпті болады деп ойлаймын. Бірақ біз еліміз бойынша апат салдарын жою шараларын қабылдап жатырмыз. Бұған дейін айтқанымдай, Үкімет зардап шеккен азаматтардың барлығына қолдау көрсетеді. Біз су тасқыны салдарынан болған барлық шығынды өтейміз. Әрбір азамат, әрбір отбасы мемлекеттің қамқарлығында болады. Бұл – мен үшін басты міндет", – деді Қасым-Жомарт Тоқаев

Мемлекет басшысы еліміздің бірқатар өңіріндегі су тасқынына байланысты қалыптасқан күрделі жағдайды ескере отырып, сондай-ақ бюджет қаржысын үнемдеу мақсатында Үкіметке, орталық мемлекеттік және жергілікті атқарушы органдарға имидждік және басқа да ірі іс-шараларды өткізбеу жөнінде тапсырма берді.

"Мен бюджет қаржысын үнемдеу мақсатында ірі халықаралық форумды өткізуден бас тарттым. Сонымен қатар Дүниежүзілік көшпенділер ойындарына жұмсалатын шығынды қысқартамыз. Әрине, қазір бұл шарадан түпкілікті бас тарту мүмкін емес. Бірақ оған жұмсалатын қаржы көлемі айтарлықтай азаяды. Бұдан бөлек, еліміздің Токиода өтетін Дүниежүзілік көрмеге қатысуына бөлінген бюджет те қысқарады", – деді Президент.

Сонымен қатар, Қасым-Жомарт Тоқаев барлық мемлекеттік органға су тасқыны салдарынан сабақ алуы керек екенін айтты.

"Бізде мұндай апаттарды алдын ала ескерту жүйесі жетіспейді. Қажетті мамандар да тапшы. Қазір гидротехник кадрларды даярлау туралы шұғыл шешім қабылданды".

Еске сала кетейік, мемлекет басшысы 16 сәуір күні СҚО-на жұмыс сапарымен барған болатын.