Танымал әнші Гүлнәр Сиқымбаева дүниеден озды

Әнші, Қазақстанның еңбек сіңірген әртісі Гүлнәр Сиқымбаева 63 жасында дүниеден озды, деп хабарлайды Zakon.kz.

Қаралы хабармен марқұм әншінің жерлесі, журналист Оралхан Дәуіт Facebook-тегі парақшасында бөлісті.

"Қайран, Гүлнәр әпке... Бір ауылда туып-өссек те жүзбе-жүз сөйлесуді Алла Тағалам жазбаған екен. Телефон арқылы талай мәрте әңгімелесіп, сұхбат та алдым. Өте ашық жарқын, керемет жан едіңіз.Өмірден ерте өткен анаңыз туралы жиі айтып, мұңайып қалушы едіңіз. Енді міне, аяқ астынан анаңыздың артынан аттанып кете барыпсыз...Алла Тағалам о дүниеңізді берсін. Ағайын, бүгін белгілі әнші, Қазақстан Республикасының еңбек сіңірген артисі Гүлнар Сиқымбаева қайтыс болды", делінген жазбада.

Сондай-ақ ол марқұмның жаназасы 6 қазанда сағат 12-де Түркістан облысы, Төлеби ауданы, Жамбыл ауылында өзі туып-өскен қарашаңырақта өтетінін де нақтылай көрсеткен.

Танымал әнші Гүлнар Сиқымбаева Оңтүстік Қазақстан облысы Төле би ауданының Майбұлақ ауылының тумасы. "Мен саған өкпелемеймiн" атты әнімен елге кеңінен танымал талантты әншінің "Бишi қайың", "Қыз-қарағай", "Сары бидай", "Мен деп ойла", "Сүйген жүрек", "Туған жер", "Наркескен", "Күз секiлдi" сияқты туындыларды орындау арқылы көрерменнің сүйіспеншілігіне бөленген.