Шымкентте шенді мен медбике мүмкіндігі шектеулі балалардың ата-аналарынан пара алып келген

Шымкент қаласының Еңбек және әлеуметтік қорғау департаментінің бөлім бастығы мен қалалық емхананың медбикесі мүгедектікті заңсыз рәсімдегені үшін кінәлі деп танылды, деп хабарлайды Zakon.kz.

Otyrar.kz басылымы медбике арада делдал болғанын, ал бұрынғы бөлім бастығы мүгедектікті ұзартқаны үшін мүмкіндігі шектеулі балалардың ата-аналарынан жүйелі түрде 500 мың теңге көлемінде пара алып келгенін жазады.

"Мүгедектікті тағайындау, жұмысқа орналасуға жәрдемдесу және әлеуметтік төлемдерді ұсыну процесінде, сондай-ақ әлеуметтік қызметтер үшін бюджет қаражатын пайдалану саласында бұзушылықтар анықталды. Бұл салада департамент қылмыстық істі тіркеді. Мүгедек балалардың ата-аналарынан мүгедектікті рәсімдегені үшін жүйелі түрде пара алған Еңбек және әлеуметтік қорғау департаментінің бөлім бастығы мен қалалық емхана қызметкеріне қатысты үкім шықты". Шымкент сыбайлас жемқорлыққа қарсы іс-қимыл департаменті басқармасының басшысы Жандос Бекасанов

Жандос Бекасановтың айтуынша, бөлім бастығына 23 млн теңге, ал медбикеге 10 млн теңге көлемінде айыппұл салынды.

2025 жылы 20 қаңтарда параны "эскиздер" деп атаған Қорғаныс министрлігінің шенеунігі 4 жылға сотталғаны белгілі болды.