Шымкентте ақшаны жылыстату схемасы әшкереленді: ерлі-зайыптылар 309 миллион теңгенің мүлкінен айырылды

ҚМА Шымкент қаласы бойынша департаменті суррогаттық алкоголь өнімдерін өндіретін жасырын цех қызметінен алынған қылмыстық кірістерді жасыру және заңдастыру схемасын анықтады, деп хабарлайды Zakon.kz.

Тергеу барысында 2022 жылдан бастап ерлі-зайыпты Қарсеновтар қолдан жасалған акциздік маркаларын және этил спиртін пайдаланып, заңсыз алкоголь өнімдерін өндіруді ұйымдастырғаны белгілі болды.

Өнім Шымкент қаласында ғана емес, сондай-ақ көршілес Түркістан және Жамбыл облыстарында да сатылған.

Тінту барысында 9 мың литрден астам этил спирті, 24 мыңнан астам жалған акциз маркалары, әртүрлі маркалы дайын алкоголь өнімдері және 75 млн теңге көлемінде ақшалай қаражат тәркіленді.

Қылмыстық жолмен алынған қаражатқа күдіктілер жалпы құны 234 млн тенгені құрайтын 13 қымбат көлік ("Toyota Land Cruiser 300", "ZEEKR 001", "KIA K8", "Hyundai Grandeur", "VOLVO" және т.б.) сатып алған, тәркілеуден жасыру мақсатында олардың бір бөлігін жақын туыстарына рәсімделген.

Сот үкімімен аталған тұлғалар заңсыз кәсіпкерлік (ҚК 214-бабының 2-бөлігі, 2-тармағы), акцизделетін тауарлардың таңбалау тәртібі мен ережелерін бұзу (ҚК 233-бабының 2-бөлігі), қылмыстық жолмен алынған ақша мен мүлікті заңдастыру (ҚК 218-бабының 3-бөлігі, 3-тармағы) бойынша кінәлі деп танылды.

ҚМА азаматтардың денсаулығына қауіпті суррогаттық алкоголь өнімдерін сатудың және тұтынудың айтарлықтай қауіп төндіретінін ескертеді. Технологиялық процестерді бұзып, сертификатталмаған ингредиенттерді қолдану арқылы дайындалған осындай сусындар құрамында улануға, ауыр дертке, тіпті өлімге соқтыратын қауіпті заттар болуы мүмкін