Сахара шөлінде адасып кеткен ер адам бес күннен кейін аман табылды

Ливия шөлінде бес күн бойы із-түзсіз жоғалған Марван әл-Бахиджи тірі күйінде табылды, деп хабарлайды Zakon.kz.

Need To Know басылымының мәліметінше, Брега қаласының тұрғыны 12 мамыр, сейсенбі күні мұнай кен орнынан шыққаннан кейін жоғалып кеткен. Алдын ала болжам бойынша, ол шөл далада жолынан жаңылып, кейін көлігі адам жетуі қиын аймақта бұзылып қалған.

Ер адамды іздеу бірнеше күнге созылған. Іздеу жұмыстарына еріктілер, жол талғамайтын көліктер мен авиация тартылып, әлеуметтік желілерде де кең ауқымды ақпараттық науқан жүргізілген.

Марван әл-Бахиджи Ливиядағы Джихарра аймағының оңтүстік-шығысындағы Рамль-81 ("Құм-81") аумағынан табылған. Аптап ыстық пен сусыз қалу қаупіне қарамастан, оның жағдайы тұрақты деп бағалануда. Белгілі болғандай, ол бұған дейін өзі шөлге жалғыз сапарға шығудың қауіпті екенін айтып, адамдарды серіксіз жолға шықпауға шақырған екен.

Мамандардың пікірінше, оның аман қалуына көлігінің жанында қалғаны себеп болуы мүмкін. Себебі шөлде жаяу жүрген адамға қарағанда, көлікті әуеден де, жерден де табу әлдеқайда оңай.

Оның табылған сәті видеоға түсіріліп, әлеуметтік желіде кеңінен тарады.

Young Man Found Alive After Spending 5 Days Lost In Desert Beside His Broken Vehicle pic.twitter.com/cADxvONClw

— Iamelizabeth (@elizabethblogng) May 19, 2026

Бұған дейін екі альпинист Эверестке шығуда жаңа рекорд орнатқанын жазғанбыз.