Риддердегі жылу электр орталығына 11 миллион теңге айыппұл салынды, тұрғындар үшін жылу тарифі төмендеді

13:11, 24 наурыз 2023

© Сурет: Zakon.kz

Уәкілетті органдар Риддердегі жылу электр орталығына қатысты бұзушылықтарды жою туралы нұсқама шығара отырып, 11 млн теңгеден астам сомаға әкімшілік жаза қолданды. Бұл жөнінде Zakon.kz басылымына Шығыс Қазақстан облысының прокуратурасы хабарлады.

2022 жылдың қараша айында Риддер қаласының жылу электр орталығында апат болды, бұл қала тұтынушыларына жылу берудің төмендеуіне әкеп соқтырды.

"Тексеру нәтижелері "Риддер ЖЭО" АҚ - ның қанағаттанарлықсыз техникалық жай-күйін көрсетті. 240-тан астам заңнамаларды бұзу фактілері анықталды".Шығыс Қазақстан облысының прокуратурасы

Прокуратураның ұсынысы бойынша "Риддер ЖЭО" АҚ жылу энергиясын тиісті деңгейде жеткізбегені және сапасының нашарлағаны үшін төлемді қайта есептеу арқылы 63,3 млн теңге сомасына 21,7 мың тұтынушыға залал өтелді.

Шығыс Қазақстан облысының прокуратурасының мәліметінше, тексеру барысында 548 млн. теңге сомасына тарифтік смета мен инвестициялық бағдарламаның қаражатын мақсатсыз жұмсау туралы табиғи монополиялар туралы заңнаманы бұзу фактісі анықталды.

"Риддер ЖЭО" АҚ үшін 2023 жылғы 1 сәуірден бастап 2024 жылғы 31 наурызға дейін халыққа тарифті 18%-ға төмендете отырып, уақытша өтемдік тарифті бекітті.

23 наурызда сағат 07.50-де Риддер ЖЭО №6 қазандығында апат болды.