Президент өндірістегі DeepTech жобаларды дамытуға арналған бірыңғай механизм құруды тапсырды

Президент Қасым-Жомарт Тоқаев өндірістік DeepTech жобаларды ілгерілету және мықты технологиялық командалар жасақтау маңызды екенін айтты, деп хабарлайды Zakon.kz.

Мемлекет басшысының айтуынша, индустриялық міндеттерді шешетін командалардың құрамына ғылыми қауымдастық, технологиялық компаниялар мен стартаптар экожүйесінің өкілдері кіруі қажет.

Ол AI Challenge механизмін қолдануды ұсынды. Бұл іске цифрлық көшпелілер мен талантты жастарды тартуға болады. Командаларды ашық іріктеуден бастап, әзірленген шешімдерді нақты өндірісте сынақтан өткізуге дейінгі үдеріс міндеттердің ерекшелігіне қарай бейімделуі тиіс.

Сондай-ақ командаларға қажетті деректерге, есептеу ресурстарына және өндірістік инфрақұрылымға қолжетімділік берілуі керек. Ал тапсырыс беруші үдерістің барлық кезеңіне қатысуы қажет.

Үкімет бастапқы тәуекелдерді азайтып, жеке капиталды тартуға жағдай жасауы керек. Кейін перспективті жобалар негізінен нарықтық ортада дамуға тиіс.

Сонымен қатар Тоқаев AI-Sana бағдарламасын өндірістегі нақты міндеттермен байланыстыру қажеттігін айтты. Оның пікірінше, дарынды жастар экономиканы жаңғырту бағытында практикалық тәжірибе жинақтауы керек.

Президент сондай-ақ сәтті сынақтан өткен технологиялық шешімдерді кеңінен енгізудің тиімді тетігін қалыптастыру қажеттігіне назар аударды.

Оның айтуынша, көптеген перспективті шешімдер пилоттық жобадан сәтті өткеннен кейін қосымша келісімдер, қайталама сынақтар, күрделі сатып алу рәсімдері мен заңнамалық шектеулерге байланысты әрі қарай дамымай қалады.

Сондықтан Үкіметке табысты пилоттық жобаларды қысқа мерзімде коммерцияландыру және кеңінен тарату жолдарын қарастыру тапсырылды. Экономикалық тұрғыдан тиімді шешімдерді енгізу кезінде артық әкімшілік кедергілерді азайту көзделіп отыр.