Президент Ахмет Жұбанов атындағы қазақ музыка мектебін 60 жылдық мерейтойымен құттықтады

22:49, 2 желтоқсан 2024

© Сурет: ҚР Мәдениет және ақпарат министрлігінің баспасөз қызметі

2024 жылғы 2 желтоқсанда Президент Қасым-Жомарт Тоқаев Ахмет Жұбанов атындағы дарынды балаларға арналған мамандандырылған қазақ музыкалық мектеп-интернатты 60 жылдық мерейтойымен құттықтады, деп хабарлайды Zakon.kz.

Бұл туралы ҚР Мәдениет және ақпарат министрлігінің баспасөз қызметі хабарлады.

Биыл Ахмет Жұбанов атындағы дарынды балаларға арналған мамандандырылған қазақ музыкалық мектеп-интернатының ашылғанына 60 жыл толды. Мерейтойға орай ерекше концерт ұйымдастырылды.

Қазақстанның Мәдениет және ақпарат министрі Аида Балаева Президент Қасым-Жомарт Тоқаевтың құттықтау хатын оқып берді.

"Халқымыздың біртуар перзенті Ахмет Жұбановтың бастамасымен ашылған білім ордасы бүгінде дарынды балаларды тәрбиелеудің өзіндік дәстүрін қалыптастырған іргелі оқу орнына айналды. Сіздерге қазақтың музыка өнерін дамыту жолындағы еселі еңбектеріңіз үшін зор ризашылығымды білдіремін. Алдағы уақытта да дарынды әрі саналы ұрпақ өсіріп, ел игілігіне аянбай қызмет ете бересіздер деп сенемін", – делінген Мемлекет басшысының хатында.

Марапаттау, Аида Балаева, Ахмет Жұбанов атындағы музыка мектебі, мерейтой, сурет - Zakon.kz жаңалық 02.12.2024 22:49

Сурет: ҚР Мәдениет және ақпарат министрлігінің баспасөз қызметі

Сондай-ақ, Қасым-Жомарт Тоқаев түрлі байқауларда топ жарып, халқымыздың мерейін асырған мектеп шәкірттерін бүкіл еліміз мақтан тұтатынын атап өтті.

Мерейтойға орай мектептің бірқатар ұстаздарына мемлекеттік марапаттар табысталды.

Мектеп-интернаттан 60 жыл ішінде мыңға жуық музыкант түлеп ұшқан.

Оқу орнында білім алған 800-ден астам өнерпаз халықаралық және республикалық конкурстар мен фестивальдердің лауреаты атанған. Қазіргі таңда мектепте 500-ге жуық дарынды бала білім алуда. Оқу орны "Теория және композиция", "Скрипка және альт", "Виолончель және контрабас", "Арнайы фортепиано", "Үрмелі және ұрмалы аспаптар", "Халық аспаптары", "Міндетті фортепиано", "Хор дирижерлығы" және "Концертмейстерлік шеберлік" секілді 10 бағыт бойынша кәсіби музыканттарды дайындайды.

Бұған дейін Қазақ Ұлттық өнер университетінің "Вокалдық өнер" кафедрасының 4-курс студенті Нұрсұлтан Әнуарбек Мәскеуде өткен XXVIII Халықаралық "Романсиада-2024" орыс романсы байқауында бірінші орынды иеленгенін жазғанбыз.

Источник: zakon.kz

Подписывайтесь на наш Telegram-канал. Будьте в курсе всех событий!
Мы работаем для Вас!