ҚТЖ арнайы техниканы су басу аймақтарына жедел жеткізу үшін вагондар бөлді

Қазақстан темір жолы арнайы техниканы Қазақстанның басқа өңірлерінен су басу аймақтарына жедел жеткізу үшін вагондар бөлді. Тиісті тапсырманы вице-премьер Қанат Бозымбаев берді, деп хабарлайды Zakon.kz.

Теміржолшылар су тасқыны салдарын жою және авариялық-құтқару жұмыстарын жүргізу үшін өңірлерге тәулік бойы арнайы техниканы тасымалдауды ұйымдастырады.

"Алматы, Қарағанды, Маңғыстау, Түркістан, Қызылорда, Шымкент, Қостанай станцияларынан бульдозерлер, тракторлар, самосвалдар, камаздар, тиегіштер, манипуляторлар, су тасқынымен күресуге арналған крандар Орал, Атырау, Ақтөбе және т. б. бағытталды". "ҚТЖ" ҰК" АҚ баспасөз қызметі

ҚТЖ пойыздарымен авариялық-құтқару жұмыстарына қатысу үшін 4 мың құтқарушы, әскери қызметші тасымалданды. Су басу орындарына гуманитарлық көмек жеткізу үшін пойыздар құрамындағы вагондар бөлінді.

"Атырау - Құлсары - Атырау және Құлсары - Маңғыстау бағыттары бойынша 12 мың адам өтеусіз негізде жолаушылар пойыздарымен тасымалданды. 2 мыңнан астам жолаушы Атырау - Маңғыстау, Атырау – Алматы және Атырау - Астана бағыттары бойынша қосымша вагондармен шығарылды. Қосымша пойыздар Орал — Қызылорда, Атырау - Қарағанды, Алматы — Атырау бағыттары бойынша жүреді, бұл 2 мыңнан астам жолаушыны тасымалдауға мүмкіндік берді", делінген хабарламада.

Су тасқынынан зардап шеккен аудандардан 500 баланы емдеу-сауықтыру орталықтары мен балалар лагерьлеріне тасымалдау ұйымдастырылды.Су тасқыны кезінде елдің кейбір аймақтарында темір жол жалғыз көлік түрі болып қалып отыр.

Сондай-ақ ҚР Төтенше жағдай министрлігі Батыс Қазақстан облысының аумағында су тасқынына қарсы іс-шараларды жүргізу мақсатында Қарағанды облысынан екі теміржол эшелонымен инженерлік, арнайы және су айдау техникалары жөнелтілгенін де нақтылады.