Қазақстанда авиация, кеме қатынасы және теміржол мамандарын даярлауға баса назар аударылады

Үкімет отырысында Президент жариялаған жұмысшы кәсіптерін іске асыру шеңберінде көлік саласындағы кадрлар тапшылығы мәселелеріне назар аударылды. Атап айтқанда, авиация, теміржол және кеме қатынасы сияқты жоғары технологиялық салалардағы маман жетіспеушілігі қозғалды.

Премьер-министр көлік министрлігіне компаниялармен бірлесіп осы салалар үшін мамандар даярлаудың нақты жоспарын әзірлеуді тапсырды.

"Агроөнеркәсіп кешенін орнықты дамыту үшін Ауыл шаруашылығы министрлігі өңір әкімдерімен бірлесіп, ауылдағы мамандарға тартымды жағдай жасау мәселелерін белсенді түрде пысықтап, осы бағытта жаңа бағдарламаларды іске қосуы қажет", – деп атап өтті премьер Олжас Бектенов.

Сондай-ақ, Энергетика министрлігі компаниялармен бірлесіп жер қойнауын пайдаланушылармен, жұмыс берушілермен, бейінді колледждермен тығыз өзара іс-қимыл жасай отырып, жұмысшы кадрларды даярлау бойынша үлкен жұмыс жүргізуі тиіс.

"Сонымен қатар кадр даярлау және қайта даярлау процесіне бизнес те белсенді атсалысуы қажет. Елімізде жұмыс беруші есебінен біліктілігін арттыруға баратын қызметкерлер үлесі тек 6%-ды құрайды. Сондай-ақ ЭЫДҰ елдерінде бұл көрсеткіш 48%-ға жетеді",- деді Бектенов.

Осыған байланысты Премьер-министр бизнесті жұмысшы кадрлардың біліктілігін арттыруға, оларды әлеуметтік қолдауға және лайықты еңбек жағдайларын жасауға күш салуға шақырды.

Бұған дейін Премьер-министр жұмысшы кәсіп өкілдеріне жеңілдетілген ипотека әзірлеуді тапсырғандығы хабарланған болатын.