Қазақстан бойынша «CVK» қаржы пирамидасының қызметі тоқтатылды: миллиондаған қаржыға тыйым салынды

Қаржылық мониторинг агенттігі бүгін, 2026 жылғы 8 маусымда "CVK" қаржы пирамидасының қызметі тоқтатылғанын мәлімдеді, деп хабарлайды Zakon.kz.

Сотқа дейінгі тергеп-тексеру еліміздің бірден 14 өңірінде жүргізілуде.

"Жоба өзін маркетплейс ретінде таныстырып, қатысушыларға тұрақты табыс әкелетін түрлі инвестициялық "дүкен" пакеттерін сатып алу ұсынылған. Сауда қызметін имитациялау мақсатында жеке кабинетте шын мәнінде болмаған тауарларға қатысты орындалған тапсырыстар мен жеткізілімдер көрсетіліп, сол үшін виртуалды сыйақылар есептелген. Негізгі назар реферальдық жүйеге аударылған: қатысушыларға жаңа салымшыларды тартқаны үшін қатысушыларға ақшалай бонустар мен бағалы сыйлықтар уәде етілген",- делінген ақпаратта.

Агрессивті өңірлік маркетинг пен ауқымды жарнамалық науқанның нәтижесінде ұйымдастырушылар заңсыз схемаға шамамен 1,5 мың салымшыны тартқан.

Жобаны ілгерлету мақсатында жабық үгіт-насихат кештері, кеңселердің салтанатты ашылу рәсімдері және жаппай таныстырылымдар өткізілген. Аталған іс-шаралар әлеуметтік желілерде кеңінен жарияланып, халықтың сенімін қалыптастыру құралы ретінде пайдаланылған.

"Ақша қаражатын шығару криптовалюталық платформа арқылы жүзеге асырылып, кейін банктік шоттарға аударылған. Агенттіктің жедел шаралары нәтижесінде 474 мың USDT көлеміндегі криптоактивтерге тыйым салынды",- деп атап өтті ведомство.

Тергеп-тексеру жалғасуда.

Егер сіз "CVK" қаржы пирамидасының қызметінен зардап шексеңіз, тұрғылықты жеріңіз бойынша Қаржылық мониторинг агенттігінің аумақтық департаменттеріне жүгіне аласыз.

Бұған дейін рақымшылыққа ілігіп, қайта қылмыс жасаған қазақстандық туралы жазғанбыз.