Елорда кәсіпкерлеріне букмекерлік кеңселер жарнамасы үшін айыппұл қарастырылатыны еске салынды

2024 жылдың 9 қыркүйегінде Қазақстанда букмекерлік кеңселер мен букмекерлік дүкендердің сыртқы жарнамасына тыйым салатын заң күшіне енді. Бұл реттегі айыппұл көлемі 1,5 миллион теңгеге дейін жетеді, деп хабарлайды Zakon.kz.

Елорда әкімдігінің мәліметінше, қаладағы букмекерлік кеңселерге арналған жарнамасы бар 290-нан астам нысан жойылды.

"Астана-Жарнама" сыртқы жарнамаларды бақылауды жалғастыруда. Аудан әкімдіктерімен бірлесе отырып, кәсіпкерлерге заң талаптарын түсіндіруге бағытталған іс-шаралар тұрақты өткізіліп тұрады. Бұзушылықтар анықталса, заңсыз жарнама жойылып, оны таратушылар әкімшілік жауапкершілікке тартылады", делінген әкімдік хабарламасында.

Заңға сәйкес, букмекерлік кеңселерді ғимараттың қасбеттеріне, ашық алаңқайларға, көліктерге және сыртқы құрылыстарға жарнамалауға тыйым салынады. Жарнамаға тек букмекерлік кеңселерде, спорт ғимараттарында және спорттық жабдықтарда ғана рұқсат етіледі. Букмекерлік компаниялардың логотиптері мен сауда белгілерін бизнестің басқа түрлерін жарнамалауда пайдалануға да тыйым салынады.

ӘҚБтК-нің 455-бабына сәйкес, заңды бұзғаны үшін 236 мыңнан 1,5 миллион теңгеге дейін айыппұл салынады.

Айта кетсек, енгізілген заңдағы өзгерістерге байланысты Қазақстанда заңсыз жұмыс істеп жатқан шетелдік букмекерлік кеңселер мен тотализаторлардың жолы кесіледі.