Бірнеше жұмыс орнынан бірдей жарна ұстау жайына қатысты медсақтандыру қоры жауап берді

Әлеуметтік медициналық сақтандыру қоры Басқармасы төрағасының орынбасары Ғалымжан Әбілов қазақстандықтардың барлық табыс көздерінен МӘМС аударымдары не үшін ұсталатынын түсіндірді, деп хабарлайды Zakon.kz.

Оның айтуынша, заңға сәйкес МӘМС жүйесіне аударымдар барлық кіріс көздерінен жүргізіледі.

"Егер адам екі жұмыс жұмыс істесе, онда тиісінше екі жұмыстан да шегерімдер жасалады. Алайда, егер жиынтық табыс 850 мың теңгеден асатын болса (бұл - 10 ең төменгі жалақы көлемі), онда жарналар тек осы сомадан есептеледі. Мысалы, егер бір жұмыс орнынан 500 мың теңге, ал екінші жұмыстан 1 млн теңге жалақы алсаңыз, онда 1,5 млн теңгеден емес тек 850 мыңнан есептелетін болады. Жеке кәсіпкер (ЖК) жалдамалы жұмыскерлері үшін жұмыс беруші ретінде жарналар төлейтін, сондай-ақ өзі үшін аударымдар жасайтын жағдайлар жиі болады. Осыған байланысты сұрақтар туындайды. Алайда денсаулық туралы кодексте азаматтардың, мемлекеттің және жұмыс берушінің ортақ жауапкершілігі бекітілген. Бұл жұмыс берушіні өзі ЖК болса да, өз қызметкерлері үшін жарна төлеуге міндеттейді", - деп сөзін толықтырды Ғалымжан Әбілов.

Оның айтуынша, бүгіндері ең төменгі жарналар 4 200 теңгені құрайды.

"Бұл - басқа елдермен салыстырғанда өте аз сома. Бір жыл ішінде ол шамамен 50 мың теңгені құрайды. Салыстыру үшін, соқырішекке жасалатын ота тарифін қарастырайық, ол 163 мың теңгені құрайды. Осылайша, халықтың жүйеге енгізетін жарналарының сомасы МӘМС шеңберінде ұсынылатын медициналық қызметтер көлемімен салыстырғанда шамалы. Әлеуметтік медициналық сақтандыру жүйесінің мәні ынтымақтығында жатыр: біз бар азаматтарымызды емдеу үшін аз-аздан қаражат саламыз", - деді Әбілов.

Ол бүгінгі таңда медициналық қызметтердің негізгі тұтынушылары балалар, содан кейін зейнеткерлер және азаматтардың басқа санаттары екенін атап өтті.

"Балалар жетекші орынға ие, өйткені олардың денсаулығының алдын алуға көп қаражат жұмсалады: вакцинация, мектеп жасына дейінгі тексеру, жаңа туған нәрестелерді бақылау, патронаж және басқа да шаралар. Бұл шығындар зейнеткерлердің шығындарынан едәуір асып түседі. Кішкентай алшақтыққа қарамастан, бұл медициналық қызметтерді тұтынушылардың басты санаты балалар болып қала береді", – деді ӘМСҚ төрағасының орынбасары.

Бұған дейін МӘМС жүйесіне 2027 жылға дейін өзгерістер енгізу жоспарланып отырғаны хабарланған.