Беларусь Республикасы ресми түрде ШЫҰ мүшесі болды

2024 жылғы 4 шілдеде Астанада Шанхай Ынтымақтастық Ұйымына мүше мемлекеттер басшылары кеңесінің 24-ші отырысы Беларусь Республикасын ШЫҰ мүшелігіне қабылдау рәсімінен басталды, деп хабарлайды Zakon.kz.

Қазақстан Президенті отырысты аша отырып, бүгін Астанадағы саммитте ұйымды одан әрі кеңейту туралы маңызды шешім қабылданатынын атап өтті.

"Осыған байланысты Беларусь Республикасының Президентін құттықтағым келеді. Сіздің еліңіз қысқа мерзім ішінде ШЫҰ-ға толыққанды мүше болу жолында барлық қажетті рәсімдерді орындады. Егер қарсылық болмаса, отырысты ШЫҰ-ға мүше мемлекеттердің құрамына Беларусь Республикасын қабылдау туралы құжаттарға қол қою рәсімінен бастауды ұсынамын". Қасым-Жомарт Тоқаев

Бұдан әрі ШЫҰ-ға мүше мемлекеттердің басшылары Беларусь Республикасын ШЫҰ-ға қабылдау бойынша және оған ШЫҰ-ға мүше мемлекет мәртебесін беру туралы құжатқа қол қойды.

Бұған дейін ШЫҰ-ға мүше мемлекеттердің тізімі келесідей болған:

• Үндістан;
• Иран;
• Қазақстан;
• Қытай;
• Қырғызстан;
• Пәкістан;
• Ресей;
• Тәжікстан;
• Өзбекстан.

Естеріңізге сала кетейік, осыдан тура бір жыл бұрын, 2023 жылғы 4 шілдеде Шанхай Ынтымақтастық Ұйымына мүше елдердің құрамына ШЫҰ мемлекет басшылары кеңесінің онлайн-отырысының қорытындысы бойынша Иран ресми түрде кірді.

ШЫҰ 2001 ж. 15 шілдеде Шанхай қаласында алты мемлекеттің (Қытай, Ресей, Қазақстан, Қырғызстан, Тәжікстан және Өзбекстан) бастамасымен құрылған үкіметаралық халықаралық ұйым. ШЫҰ-ның ізашары "Шанхай бестігі" болды, ал Шанхай әріптестігі Қытай, Ресей, Қазақстан, Қырғызстан, Тәжікстан арасындағы шекарадағы әскери күшті қысқарту және сенім шараларының күшейтілуімен жүзеге асырылды. 1996 және 1997 жж. бес мемлекеттің басшылары Шанхайда және Мәскеуде кездесіп, шекара аумағында әскери сенім шараларын күшейту Келісімі және шекарадағы әскери күшті қысқарту және сенім шараларын күшейту Келісіміне қол қойды.