«Алтынбекке рақмет». Желіде тараған шендінің аудио жазбасына қатысты тергеу жүргізілетін болды

Әлеуметтік желіде айыппұл салмай, тек ескертулермен шектелген полицейлерді жазғырып, ұрсып жатқан белгісіз ер адамның аудио жазбасы тарады. Бұған қатысты Түркістан облысының полиция департаменті жауап берді, деп хабарлайды Zakon.kz.

"Мынау ма, сендердің көрсеткіштерің: 1, 19... Мына арада бәрі көрініп тұр, кімнің не істегені. Ескертуді көп жазғансыңдар. Бүгін осы мәселе бойынша бізді жинағалы жатыр... Мұның бәрі БӘҚБТ базасынан алынған (әкімшілік құқық бұзушылықтардың бірыңғай тізілімі - шамамен. ред.)... Міне, Алтынбекке рақмет, 19 күн ішінде 30 хаттама толтырған. Қалғандарыңды білмеймін, не ойлап жүретіндеріңді. Қамбар, сен 7-ақ ескерту жазғансың. Ал мен сені еңбекқор деп ойлап жүрсем", – дейді белгісіз адам желіде тарап кеткен аудиожазбада.

Сондай-ақ, әлеуметтік желіде тараған ақпаратта мұндай заңсыз нұсқаулар үшін ҚР ІІМ басшылығы қызметкерлерін қатаң жазалайтыны да айтылады.

"Аталған факт бойынша Түркістан полиция басқармасы тексеру амалдарын қолға алды, оның нәтижелері бойынша полиция қызметкерлерінің іс-әрекеттеріне құқықтық баға берілетін болады", - деді Zakon.kz тілшісіне Түркістан облысы ПД баспасөз қызметі.

Сондай-ақ, өңір полициясы олардың "әкімшілік хаттамалар толтыруда сандық нормативтерді белгілеу тәжірибесі алынып тасталғанын және осыған ұқсас нұсқаулар берілмегенін" атап өтті.

"Сонымен қатар, полиция қызметкерлерінің қызметінде берілетін басымдық әрқашан қоғамдық құқықтық тәртіпті қамтамасыз ету және азаматтардың құқықтарын қорғау, сондай-ақ халық үшін қауіпсіз және жайлы орта құру болып табылады". Түркістан облысы ПД баспасөз қызметі

Бұған дейін Солтүстік Қазақстан облысының прокурорлары 24 қаңтарда автокөлікті 5 минуттан артық қыздырғаны үшін полицейлердің жүргізушіге салған әкімшілік айыппұлының күшін жойғанын жазғанбыз.