Алматы автобустарында жолақы төлеудің жаңа жүйесі: жолаушылар нені білуі керек

Алматы қаласында жолақы төлеудің Avtobys атты бірыңғай цифрлық жүйесі кезең-кезеңімен енгізіле бастады. Жаңа жүйе туралы жолаушыларға маңызды ақпаратты Zakon.kz ұсынады.

AlmatyJoly мекемесінің 2026 жылғы 10 ақпандағы мәліметінше, Avtobys – еліміздің басқа қалаларында қолданыста бар заманауи цифрлық шешім.

Жүйені пайдалану үшін Google Play немесе App Store платформаларынан Avtobys қосымшасын жүктеп, телефон нөмірі арқылы тіркеліп, смарт-әмиянды толтыру қажет.

Жолақыны төлеу тәсілдері

Жаңа жүйе жолаушыларға жолақыны өзіне ыңғайлы әдіспен төлеуге мүмкіндік береді. Атап айтқанда, төлем мына жолдармен жүзеге асырылады:

• банк картасы арқылы;
• көлік картасы арқылы;
• Apple Pay, Samsung Pay және Google Pay қызметтері арқылы;
• Avtobys мобильді қосымшасы арқылы (QR-код, NFC, Bluetooth);
• банктер мен ұялы байланыс операторларының қосымшалары арқылы;
• көлік нөмірі арқылы.

Жолақыны төлеу қолма-қол ақшасыз әрі қосымша әрекеттерсіз жүзеге асырылатыны атап өтілді.

Жеңілдік санатындағы жолаушылар үшін

Сондай-ақ жаңа жүйенің қосымшасы арқылы кеңселерге бармай-ақ және қағаз құжатсыз жеңілдетілген тарифтерді рәсімдеуге болатыны хабарланды.

Жолаушыларға пайдасы

Avtobys жүйесі жолаушыларға мына мүмкіндіктерді береді:

• қоғамдық көліктің қозғалысын онлайн бақылау;
• келу уақытын болжау;
• маршруттарды алдын ала жоспарлау.

Қалаға пайдасы

Цифрлық жүйе мыналарға мүмкіндік береді:

• нақты жасалған сапарларды есепке алу;
• билетсіз жүруді азайту;
• маршруттарды дәлірек жоспарлау;
• деректерге сүйене отырып шешім қабылдау.

Ашық есеп жүргізу қоғамдық көлікті субсидиялаудың әділ моделін қалыптастыруға көмектеседі.

Жүйені енгізу қалай жүргізіледі

Алматыда жаңа жүйені енгізу кезең-кезеңімен жүзеге асады: алдымен Avtobys кейбір маршруттарда іске қосылады, кейін біртіндеп бүкіл қалалық қоғамдық көлікке енгізіледі. Бұл жолаушыларға күрт өзгерістер әкелмейді.

Алматыда жолақыны төлеудің бірыңғай цифрлық жүйесі — Avtobys жүйесін кезең-кезеңімен енгізу басталғаны 2026 жылғы 7 ақпанда жарияланды.