-33 °C. ТЖМ алда келе жатқан аязды күндерге байланысты мәлімдеме жасады

Алдағы күндері бүкіл Қазақстан аумағында ауа райында өзгерістер болатыны ескертілді. Бұл туралы 8 желтоқсанда Төтенше жағдайлар министрлігі құлақтандыру жасады, деп хабарлайды Zakon.kz.

Синоптиктердің мәліметінше, еліміздің басым бөлігінде ауа райы күрт өзгеріп, қатты аяз, көктайғақ болады, қар жауып, боран соғады, тұман түседі және жел екпін алады деп күтіледі.

Ең төмен ауа температурасы -20, -33 °C-ді құрап, мына өңірлерде тіркеледі:

• Ақтөбе, Қостанай, СҚО, Ақмола, Павлодар, Қарағанды, ШҚО, Алматы, Ұлытау, Абай және Жетісу облыстары.

Ал Алматы, Түркістан, Жамбыл, ШҚО, Ақтөбе, БҚО, Қызылорда облыстарында көктайғақ болады деп болжанады.

"ТЖМ қауіпсіздік шараларын сақтауды, алыс жол жүруді шектеуді, жылы киінуді және болжамдарды қадағалауды ескертеді", делінген хабарламада.

Бұған дейін 8 желтоқсанда синоптиктер Астана, Алматы және еліміздің 16 өңірінде дауылды ескерту жариялаған болатын.