Ресей мұсылмандарына көп әйел алуға рұқсат етілді

Ресейде мұсылмандар діни басқармасының ғұламалар кеңесі мұсылмандарға төрт әйелге дейін алуға рұқсат берді, деп хабарлайды Zakon.kz.

Алайда бұл жердегі міндетті шарт – күйеуінің барлық әйелдерге әділ және тең қатынасы.

"Ер адамның екінші, үшінші немесе тіпті төртінші діни некеге тұру мүмкіндігі туралы шешім қабылданды. Егер жұбайының денсаулығына байланысты, ұрпақ сүйер жастан асып кетсе немесе осыған байланысты денсаулығында кінәрат болса, бұған жол беріледі. Сондай-ақ, ерлі-зайыптылардың балалы болғысы келмеуі сияқты фактілер де ескеріледі", — деді РИА Новостиге берген сұхбатында кеңес төрағасының орынбасары және Ресей Федерациясы думалары төрағасының орынбасары, Мәскеу мүфтиі Ильдар Аляутдинов.

Оның айтуынша, күйеуінің барлық әйелдерге әділ және тең қарым-қатынасы барлығын бірдей материалдық қамтамасыз ету мен олардың әрқайсысына жеке тұрғын үй беруде, тең уақыт өткізуінде көрініс табады.

"Егер бұл шарттар орындалмаса, онда ер адамға көп әйелді некеге тұруға рұқсат етілмейді", – деп қосты мүфти.

Сондай-ақ, некеде тұрған ер адам әйеліне басқа әйелмен жаңа некеге тұру ниеті туралы хабарлауы керек. Мәселен, отбасын құрған жаңа әйелі ер адамның өзге де әйелдері бар екенін білмеген жағдайда, некені бұзуға құқылы.

Сонымен қатар, некеде тұрған ер адам басқа діни некеге тұрған кезде барлық балаларды асырап алуға, сондай-ақ өсиетті нотариалды рәсімдеуге міндетті болады.

Бұған дейін Қазақстанда қанша адамға әлеуметтік көмек көрсетілетіндігі хабарланған болатын.