Жетекші футбол қауымдастықтары FIFA президентінің мерзімінен бұрын қызметтен кетуін талап етуде

Футболдан әлем чемпионатының коммерциялық құқықтарын сатуға байланысты туындаған даулы жағдайлардан кейін бірқатар жетекші құрлықтық футбол қауымдастықтары Халықаралық футбол федерациясының (FIFA) президенті Джанни Инфантиноның қызметтен кетуін талап етіп отыр.

The Times басылымының мәліметінше, Еуропалық футбол қауымдастықтары одағы (УЕФА), Азия футбол конфедерациясы (АФК) және Солтүстік және Орталық Америка мен Кариб бассейні футбол конфедерациясының (КОНКАКАФ) басшылары Инфантино қызметінен өз еркімен кетпей, 2027 жылдың көктемінде өтетін FIFA президенті сайлауына қайта түсетін болса, ұйым жұмысына қысым көрсету жоспарын әзірлеген.

Бір апта бұрын FIFA-ның әлем чемпионатының коммерциялық құқықтарын сатумен айналысатын FIFA Forward Enterprise (FFE) атты жаңа құрылым құруды жоспарлап отырғаны белгілі болған еді. Алайда бұл бастама футбол қауымдастығы тарапынан қатты сынға ұшырап, тіпті әлем чемпионатына бойкот жариялау қаупі туындағаннан кейін Джанни Инфантино бұл идеядан бас тартуға мәжбүр болған.

Мәліметке сәйкес, құрлықтық футбол қауымдастықтары FIFA Кеңесінің және ұйым комитеттерінің отырыстарына қатысудан бас тартуға дайын. Сонымен қатар олар FIFA ұйымдастыратын турнирлерге балама болатын жаңа халықаралық жарыстар өткізу мүмкіндігін де қарастырып жатыр.

Атап айтқанда, УЕФА 2017 жылы әзірленген жаһандық Ұлттар лигасы жобасын іске қосуды жоспарлап отыр.

Сондай-ақ бірқатар бұқаралық ақпарат құралдарының хабарлауынша, Джанни Инфантиноның қарсыластары оның қызметтен дереу кетуін талап етуде.

Еске салсақ, 2026 жылғы 1 тамызда FIFA президенті Джанни Инфантино әлемдік футбол қауымдастығына үндеу жасап, Әлем чемпионатының құқықтарын жеке инвесторларға сатудан бас тартатынын мәлімдеген болатын.