Үндістанда әкесі теннисші қызын атып өлтірді

10 шілдеде Үндістанның Харьяна штатында қайғылы оқиға болды. 25 жастағы кәсіби теннисші Радхика Ядавты әкесі отбасылық жанжал кезінде үйінде атып өлтірді, деп хабарлайды Zakon.kz.

Times of India басылымының мәліметінше, Дипак Ядав қызына бес рет оқ атқан, оның үшеуі нысанаға дөп жеткен. Бір оқ спортшы қыздың тамағына, екеуі арқасына тиген.

Спортшы алған жарақаттан ауыр халде ауруханаға жеткізілгенімен, дәрігерлер оның өмірін аман алып қала алмады.

Үндістандық БАҚ тұрмыстық мәселеге қатысты екеуара дау туындағанын жазды. Әкесі қызының әлеуметтік желіде тым белсенділік танытып, қысқа видео түсіруге тым әуестеніп кеткеніне ашуланған.

Алайда тергеушілер бұған көптен бері ушығып келе жатқан жайт себеп деп отыр. Әкесіне Радхиканың теннис академиясын өзі басқаратыны ұнамайды екен, өйткені туыстары мен көршілері ер адамды «қызыңның табысына ғана қарап отырсың» деп жиі сынайтын көрінеді. Билікке таласқан әке мен қыздың арасындағы кикілжің ақыры өліммен аяқталды.