Ұлттық банк қазақстандықтарға ескерту жасады

Алаяқтар қазақстандықтарды алдау үшін дипфейктерді қолданып жатыр. Бұл туралы 2025 жылғы 20 маусымда ҚР Ұлттық банкі мәлімдеді, деп хабарлайды Zakon.kz.

Таратылған ақпаратқа сәйкес, алаяқтар өздерін Ұлттық банк, екінші деңгейлі банктер, мемлекеттік немесе құқық қорғау органдарының қызметкері ретінде таныстырып, азаматтардың қаржылық деректеріне қол жеткізуге тырысады.

Олардың құрбанына айналмау үшін, Ұлттық банк келесіні ескертеді:

"Күдікті шоттарға ақша жібермеңіз және сенімсіз хабарламаларға сенбеңіз".

Ұлттық банк:

• жеке тұлғалардың шоттарын жүргізбейді,
• инвестициялық өнімдерді ұсынбайды.

"Күдікті қоңырау түскен жағдайда әңгімені үзген дұрыс және ақпаратты банк немесе ұйымның ресми нөмірі арқылы өзіңіз тексеріңіз. Алаяқтық жағдайында құқық қорғау органдарына жүгініңіз", – делінген мәлімдемеде.

Кеңес алу үшін Ұлттық банктің Байланыс орталығына 1477 нөмірі арқылы хабарласуға болады.