Ұлттық алдын алу тетігіне қатысушыларды іріктеу ережелері өзгерді

Қазақстан Республикасындағы Адам құқықтары жөніндегі уәкілнің 2026 жылғы 3 наурыздағы бұйрығымен ұлттық алдын алу тетігіне қатысушыларды іріктеу қағидаларына өзгерістер енгізілді, деп хабарлайды Zakon.kz.

Атап айтқанда, ұлттық алдын алу тетігінің қатысушылары бола алмайтын тұлғалар нақтыланды:

• судьялар, адвокаттар, мемлекеттік қызметшілер және әскери қызметшілер, сондай-ақ құқық қорғау және арнаулы мемлекеттік органдардың, азаматтық қорғау органдарының қызметкерлері;
• психиатр немесе нарколог есебінде тұрған немесе психикалық денсаулық саласында медициналық көмек көрсететін ұйымдарда динамикалық бақылауда тұрған тұлғалар;
• мемлекеттік немесе әскери қызметтен, азаматтық қорғау органдарындағы қызметтен, құқық қорғау және арнаулы мемлекеттік органдардан, соттардан теріс себептермен босатылған немесе адвокаттар алқасынан шығарылған тұлғалар.

Сонымен қатар мыналар да қатысушы бола алмайды:

• Қазақстан Республикасы азаматы болып табылмайтын тұлғалар;
• Қазақстан Республикасының заңнамасында белгіленген тәртіппен жойылмаған немесе алынбаған соттылығы бар тұлғалар;
• қылмыстық құқық бұзушылық жасады деп күдікті немесе айыпталушы болып танылған тұлғалар;
• сот әрекетке қабілетсіз немесе әрекет қабілеті шектеулі деп таныған тұлғалар;
• қасақана жасалған қылмыстық құқық бұзушылық үшін ақтамайтын негіздер бойынша қылмыстық жауаптылықтан босатылған тұлғалар;
• адвокаттық қызметпен айналысуға берілген лицензиясынан айырылған тұлғалар.

Бұйрық 2026 жылғы 22 наурыздан бастап қолданысқа енгізіледі.