ҰҚШҰ саммиті кезінде Астанадағы ЖОО оқу форматына өзгерістер енгізілді

Қазақстанның Ғылым және жоғары білім министрлігі 2024 жылғы 26 қарашада Астананың кейбір жоғары оқу орындарында оқыту форматының өзгергені туралы мәлімдеді. Бұл шешім Ұжымдық қауіпсіздік туралы шарт ұйымының саммиті өтуіне байланысты енгізілді, деп хабарлайды Zakon.kz.

Таратылған ақпаратқа сәйкес, 27-28 қарашада елорданың жоғары оқу орындарында оқу форматы келесідей болады:

• 4 жоғары оқу орны — қашықтықтан,
• 2 жоғары оқу орны — ішінара қашықтықтан,
• 2 жоғары оқу орны — каникул (1 триместр),
• 5 жоғары оқу орны — дәстүрлі (офлайн) форматта.

"Оқу форматына қатысты шешімді жоғары оқу орындары академиялық саясатына сәйкес дербес қабылдайды".ҚР ҒЖБМ Қоғаммен байланыс департаментінің директоры Олжас Беркінбаев

Бұған дейін Ұжымдық қауіпсіздік кеңесінің шетелдік мемлекет басшыларының қатысуымен өтетін отырысын дайындау және өткізу аясында 2024 жылғы 27-28 қарашада көлік құралдарының қозғалысына уақытша шектеулер елорда көшелерінің жекелеген учаскелерінде енгізілгені хабарланды.

Сондай-ақ, Қасым-Жомарт Тоқаевтың шақыруымен 27 қараша күні елімізге Ресей Федерациясының Президенті Владимир Путин мемлекеттік сапармен келеді.