Тегін шұғыл көмек: қазақстандықтарға Денсаулық сақтау министрлігі маңызды мәлімдеме жасады

ҚР Денсаулық сақтау министрлігі бүгін азаматтарға маңызды ақпаратпен жүгінді, деп хабарлайды Zakon.kz.

Хабарламаны ведомство 2025 жылдың 17 қаңтарында өзінің Telegram арнасында жариялады.

"Барлық шұғыл медициналық көмек – МӘМС жүйесіндегі сақтандыру мәртебесіне қарамастан тегін медициналық көмектің кепілдік берілген көлемі (ТМККК) шеңберінде тегін көрсетіледі",- делінген ақпаратта.

Қандай жағдайларда шұғыл қызметтің көмегіне жүгінуге болады?

Денсаулық сақтау министрлігі созылмалы немесе әлеуметтік мәні бар аурудың өршуі, ЖРВИ белгілері немесе жарақаттар болған жағдайда көмекке жүгінуге болатындығын айтты.

• фильт️р-кабинетке немесе өзінің немесе жақын маңдағы емхананың кезекші дәрігеріне
• ️ жақын маңдағы аурухананың қабылдау бөлімшесіне
• ️ жедел жәрдем шақырыңыз

Егер мен шұғыл емханаға немесе ауруханаға барсам, мені зерттеп-қарап, емдей ме?

"Иә. Денсаулық жағдайын тұрақтандыру үшін қажет нәрсенің бәрі сізге ТМККК пакетінде толығымен тегін көрсетіледі.Оның ішінде диагнозды верификациялау және емдеу тәсілін анықтау үшін арнайы мамандардың қажетті зерттеп-қараулары мен консультациялары, қажет болған жағдайда бекітілген тізбеге сәйкес дәрі-дәрмекпен қамтамасыз ету және тәулік бойы стационарға емдеуге жатқызу". ҚР Денсаулық сақтау министрлігі

Егер азамат шұғыл көмекке жүгінген әлеуметтік мәні бар немесе созылмалы ауру бойынша Д-есепте тұрса, ТМККК пакетінде медициналық қызметтер көрсетуді жалғастыратын болады.

"Сондай-ақ, "туберкулез" диагнозы қойылған пациенттерге оңалту көмегі ТМККК пакетінде көрсетіледі",- деп еске салды министрлік.

Бұған дейін Ұлттық Банктің базалық мөлшерлеме бойынша шешімі қабылдағаны хабарланған болатын.