Шымкент әуежайындағы жағдайға байланысты FlyArystan-ның екі рейсі бағытын шұғыл өзгертті

2026 жылғы 22 шілдеде FlyArystan әуе компаниясының екі ұшағы Шымкент әуежайының ұшу-қону жолағының (ҰҚЖ) уақытша жабылуына байланысты бағытын шұғыл өзгертуге мәжбүр болды. Ақтау мен Алматыдан үшінші мегаполиске бағыт алған рейстердің бағыты өзгеріп, салдарынан өзге де рейстер кешікті.

Бұл туралы ақпарат алғашында әлеуметтік желілерде тарады. Кейін жағдайға қатысты түсініктемені қазақстандық лоукостердің баспасөз қызметі берді.

"Ақтау – Шымкент бағыты бойынша ұшқан FlyArystan-ның FS7580 рейсі Алматы әуежайына қонды. Ал Алматы – Шымкент бағытындағы FS7105 рейсі Шымкент әуежайының ұшу-қону жолағы уақытша жабылғандықтан Алматыға кері қайтарылды. Шымкент әуежайының ұшу-қону жолағы қайта ашылғаннан кейін FS7580 рейсі жергілікті уақыт бойынша сағат 01:21-де межелі бағытына ұшты. FS7105 рейсі де Алматыдан Шымкентке жергілікті уақытпен сағат 02:56-да қайта аттанды", – деп хабарлады FlyArystan компаниясының баспасөз қызметі 23 шілдеде.

Компанияның мәліметінше, Шымкент әуежайындағы ұшу-қону жолағының уақытша жабылуына байланысты Шымкент – Ақтау бағытындағы FS7579 және Шымкент – Алматы бағытындағы FS7106 кері рейстері де кешіктірілді.

"Рейстердің бағыты мен ұшу уақытына енгізілген өзгерістер әуе компаниясына тәуелсіз жағдайларға байланысты қабылданды. FlyArystan үшін басты басымдық – ұшу қауіпсіздігін қамтамасыз ету", – деп атап өтті компанияның баспасөз қызметі.

Еске салайық, 2026 жылғы 20 шілдеде қазақстандық лоукостер Алматы – Чунцин – Алматы бағыты бойынша жаңа халықаралық рейс ашылатынын жариялаған болатын. Алғашқы рейс 2026 жылғы 23 қыркүйекте орындалады. Әуе рейстері аптасына екі рет: сәрсенбі және сенбі күндері Алматыдан, ал бейсенбі және жексенбі күндері Чунциннен Алматыға қатынайды.