Qazaq Air әуе компаниясын кім сатып алғаны белгілі болды

Қазақстандық Qazaq Air әуе компаниясын сатып алған компанияны Қасым-Жомарт Тоқаев 23 мамырда Қазақстан-Сингапур бизнес форумында атады, деп хабарлайды Zakon.kz.

Мемлекет басшысының айтуынша, географиялық алшақтық пен байланыстың нашарлығы ұзақ жылдар бойы екі мемлекеттің экономикалық ықпалдастығын тежеп келді

Бүгінде жаһандану мен дамыған инфрақұрылымның арқасында елдер арасындағы өзара байланыс бұрынғыдан әлдеқайда жақсарды. Бұл ретте Қасым-Жомарт Тоқаев отандық "Қазақстан темір жолы" компаниясы мен сингапурлық PSA International компаниясы арасындағы Транскаспий халықаралық көлік бағытының немесе "Орта дәліздің" әлеуетін пайдалануға бағытталған синергиялық серіктестікті мысалға келтірді.

"Аталған бағыт Еуразия кеңістігіндегі ынтымақтастықты мүлдем жаңа деңгейге шығара алады. Бұл – Орталық және Шығыс Азиядан Еуропаға шығатын ең төте әрі орнықты жол. Сингапур компаниялары мен қаржы институттары бұл саладағы бизнес пен инвестицияның мүмкіндіктерін зерттеп, айтарлықтай пайдаға кенеле алады деп санаймыз. Вьетнамдық SOVICO Group компаниясының Qazaq Air авиакомпаниясын жекешелендіруін құптаймын. Бұл Қазақстан мен АСЕАН елдері арасындағы әуе қатынастарын жандандыруға мүмкіндік береді", – деді Қазақстан Президенті.

Мемлекет басшысы ауыл шаруашылығы саласындағы ынтымақтастықтың маңызы зор екеніне назар аударды. Сингапур компанияларына бірлескен агроинновациялық орталықтар құру, дәлдігі жоғары егіншілік және су ресурстарын барынша тиімді пайдалану бағыттарында бірлесе жұмыс істеу ұсынылды.

Qazaq Air әуе компаниясын бірнеше әрекеттен кейін сату мүмкін болмады. 2023 жылдың тамызында авиакомпанияны жекешелендіру бойынша бірінші аукцион жарияланды, акцияның бақылау пакетінің бастапқы бағасы 10,2 млрд теңгені құрады. Үш айдан кейін қараша айында конкурс жарамсыз деп танылды. 2024 жылдың 9 қаңтарында "Самұрық-Қазына" АҚ авиакомпанияны бұрынғы бастапқы бағамен қайтадан жекешелендіруге шығаруға әрекеттенді. Және тағы да сәтсіз.