Өскеменде бір күнде жоғалған үш бала табылды

Өскемен қаласының полициясына бір тәулік ішінде кәмелетке толмаған балалардың жоғалғаны туралы екі бірдей хабарлама түсті. Жедел-іздестіру шараларының нәтижесінде барлық бала табылды.

Алғашқы болып 10 және 5 жастағы қыздардың анасы өтінішпен жүгінген. Оның айтуынша, қыздары аулаға ойнауға шығып, қайта оралмаған.

Анасы оларды өз бетінше іздеп таба алмаған соң, полицияға жүгінген. Іздестіру жұмыстарына барлық кезекші наряд жұмылдырылды. Көп ұзамай қыздар көрші ауладан табылды. Олардың өмірі мен денсаулығына ешқандай қауіп төнген жоқ.

Кейінірек екінші хабарлама 13 жастағы мектеп оқушысының әкесінен түсті. Оның қызы таңертең үйден шығып, қайта оралмаған.

Полиция қызметкерлері дереу іздестіру жұмыстарын бастап, көп ұзамай жасөспірімді қаланың бір көшесінен тапты.

Құқық қорғау органдары ата-аналарды балалардың қауіпсіздігіне ерекше мән беруге шақырады. Балаңыз жоғалып кеткен жағдайда, бірден 102 нөміріне хабарласу қажет екенін ескертеді.