Олимпиадаға іріктеу: Қазақстан әйелдер құрамасы бүгін Исландиямен кездеседі

Словакияның Пьештяни қаласында әйелдер арасындағы шайбалы хоккейден Олимпиадаға іріктеу турнирінде Қазақстан бүгін Исландиямен кездеседі, деп хабарлайды Zakon.kz.

Қазақстандық хоккейшілер D тобында сынға түсіп жатыр. Қарсыластары – Словакия, Словения және Исландия.

Қазірге дейін ел құрамасы Словакияға 1:8 есебімен жеңілсе, Словенияны 3:0 есебімен тізе бүктірді.

Аталған топта екі турдан кейін Словакия алты ұпаймен көш басында тұрса, одан кейін Қазақстан мен Словенияның еншісінде үш-үш ұпайдан бар. Ал Исландия әзірге ұпай еншілеген жоқ.

Бұл топтан тек бір ғана жеңімпаз Олимпиаданың келесі іріктеу кезеңіне жолдама алады.

Қазақстандық хоккейшілер 2002 жылы Олимпиадаға қатысып, онда жалпы есепте сегізінші орынға табан тіреді.

Қазақстан құрамасы ойыншыларының тізімі:

Қақпашылар: Полина Говтва ("Торпедо", Өскемен), Арина Щеколова ("Томирис", Астана)

Қорғаушылар: Юлия Буторина, Александра Воронова, Дария Молдабай ("Томирис", Астана), Катрин Мескини, Полина Яковлева ("Торпедо", Өскемен), Анна Пяткова, Ажар Хамимульдинова ("Айсұлу", Алматы)

Шабуылшылар: Малика Алдабергенова, Пернеш Әшімова, Алина Иванченко, Татьяна Королева, Лариса Свиридова, Мадина Турсынова, ("Айсулу", Алматы), Екатерина Куценко, Анастасия Оразбаева, Надежда Филимонова, Александра Шегай ("Томирис", Астана), София Зубкова, Дильназ Саяхатқызы, Мунира Саяхатқызы ("Торпедо", Өскемен).